Starfsemi og hlutverk
Starfsemi og hlutverk Lækningaminjasafns
Lækningaminjasafn Íslands hefur það hlutverk að varðveita og safna lækningaminjum og stuðla að rannsóknum og miðlun á heilbrigðissögu hér á landi. Í sögu lækninga rennur saga vísinda og tækni saman við sögu þjóðar og þeirra lífskjara sem hún hefur búið við.
Munir sem Lækningaminjasafn varveitir varpa ljósi á þessa sögu og í sýningum safnsins verður gerð grein fyrir henni á fjölbreyttan hátt. Jafnframt er eitt af markmiðum þess að varpa ljósi á lækningar og sjúkdóma dagsins í dag.
Lækningaminjasafn er í eigu og umsjá Seltjarnarnesbæjar en auk þess standa að safninu Læknafélag Íslands, Læknafélag Reykjavíkur, menntamálaráðuneyti og Þjóðminjasafn Íslands.
Lækningaminjasafn Íslands er ábyrgðarsafn og gegnir hlutverki sínu á landsvísu.
Markmið safnsins
- Lækningaminjasafn Íslands vinnur að varðveislu, rannsóknum á minjum tengdum heilbrigðissögu, lífskjörum og aðbúnaði íbúa landsins og miðlar þekkingu á sögu og stöðu lækninga í dag.
- Miðlun Lækningaminjasafns stuðli að aukinni víðsýni, umburðarlyndi og ánægju notenda safnsins.
- Starfsemi Lækningaminjasafns sé samfélaginu öllu til hagsbóta og stuðli að heilbrigðu líferni og bættri heilsu.
- Lækningaminjasafn er safn Seltirninga sem og Íslendinga allra.
- Safnhúsið í Nesi er vettvangur ýmissa menningarviðburða og þjónustumiðstöð fyrir þá fjölmörgu útivistarunnendur sem sækja svæðið heim.
- Lækningaminjasafn hafi frumkvæði að og leiði faglegt samstarf safna og annarra aðila á starfssviði safnsins.